---

Misis wa patanday gitigbas sa bana
Saturday, August 13, 2016
Ni JEEPY P. COMPIO

MITUGPA sa Southern Philippines Medical Center (SPMC) ang usa ka asawa human gitigbas sa iyang bana gumikan nasuko kay wala gipatanday sa ilang pagkatulog.
Ang insidente nahitabo alas dos Sabado sa kaadlawon, Agosto 13, sa Babak, Island Garden City of Samal (Igacos), probinsiya sa Davao del Norte.
Alas 3:45 kagahapon sa kaadlawon, miabot ang biktima nga si Elsa (bansagon gitago sa Superbalita), 28, nagpuyo sa Purok 7, Babak, Igacos.

Subay sa impormasyon gikan sa Trauma Complex sa SPMC, nasayran nga nagpatabang na lang ang biktima sa iyang inahan human siya gitigbas sa iyang bana tumong sa dughan ug kamot.

Giingon nga samtang nangatulog na sila, gusto sa bana nga motanday sa paa sa iyang asawa, apan wa kini mosugot maong misangko sa ilang panag-away.
Dugang pa nga samot nga nasuko ang bana gumikan gipasanginlan na kini sa biktima nga dunay laing babaye kay panagsa na lang mohangyo og tanday panahon sa ilang pagkatulog.

Sa kasuko sa bana, mikuha kini og sundang dayong gitigbas sa dughan ang iyang asawa ug maayo na lang kay nakalikay kini ug gamay ra ang nahiagumang samad.
Daling miresponde ang mga sakop sa Barangay Peace and Order Unit maong nasikop ang bana kinsa balhog karon sa Igacos Police Station.
Giandam na ang kasong Physical Injury ug paglapas sa Republic Act 9262 kun Violence Against Women and Their Children Act of 2004 batok sa suspek didto sa korte.

Gipatik sa mantalaang Superbalita Davao Agosto 14, 2016.

Source: http://www.sunstar.com.ph/superbalita-d ... ana-491307